गजल -१७  

बिगड़ल छै एहन कपार नोर कए

तोड़ने नहिं टूटल देबार नोर कए   

सए चेहरा निर्दोषक देखै क भेटत

सुनि कए देखब जौं विचार नोर कए 

लोकक सक्कत मोन किएक ने पिघलै

पाथरो क काटैत छैक धार नोर कए 

मुस्कीक गामे बसोबास छैक जिनकर 

ओ किएक बुझि पैता गोहार नोर कए 

रहितो अन्हार सभके चीन्ह गेल हम

सिखैल पाठ नै भेल बेकार नोर कए  

मोने जिनक छन्हि भेद भाब स भरल 

कहियो कि कए पैता सत्कार नोर कए 

"राजीव" सभक्यौ लूटय मजा गरीबक 

किनको बुत्ते ने भेल सम्हार नोर कए 

(सरल वार्णिक बहर,वर्ण-१५)

राजीव रंजन मिश्र