आबु यौ बाबु भैया,बैस क करी कनिक विचार 

सब गोटे छी बाप-भाई ,सबके अछि धिक्कार 

नारी शोषण,दहेज़ प्रथाक करैत छी सब प्रतिकार 

मुदा मोन स छोड़य ला,नहि छी क्यउ तैय्यार 

काल्हि तक छल  समस्या,आइ बनल संघाती प्रहार 

आबहूँ  नै जौं डाँर कसब त,भ जायत सबहक संहार 

बेटी बेर में मोछ झुकौने,बेटा काल में धनुषटंकार 

कथनी-करनी में भेद मिटा क,करी उचित व्यवहार 

आबहूँ नै जौं हम-अहाँ सचेतलौं,त भ जैब लाचार

आबु संकल्पित भ क,दहेज़ दानवक करी निस्तार 

बेटी के मानी समकक्ष आ दी बेटा सन अधिकार

नारी शिक्षा के मोल बुझी आ करी एकर विस्तार

नहि जानि कहाँ चलि गेल,मिथिला-मैथिलिक संस्कार 

जनकलली केर जन्म-भूमि पर बेटी भ गेल अछि भार 

मिथिलेशक प्रण के मोन पारि,राखी यैह  भाष-नियार 

मोनक राखल शिव-धनु जे तोड़ता तिनके देबैन गलहार 

राजीव रंजन मिश्र

१५.०६.२०१२