वेद पुराणक मुहें बखानल,हमरा लोकनिक मान छी
हिमालयक तलहट्टी हमरे आ हमरे अछि बाबा धाम
हमरे बागमती कोशी गंडक,कमला बुढ़िया बलान छी
याज्ञवलक्य आ चन्दा हमर,हमरे विद्यापति आ मंडन
गौतम कणाद आर नागार्जुन हमरे वंशज महान छी
पश्चिम चंपारणसँ जामतारा,किशनगंज आ शेखपुरा
बिहार,झारखण्ड,नेपाल मे पसरल हमर सीमान छी
लह-लह करैत माटि हमर,भरल गहुम आ धानसँ
घर-घर फैलल हमर मिथिलाक चीज़ पान-मखान छी
हम बाढि झेलल,भूकंप सहल आ रौदी में खूब तपल
तैय्यो सक्कत डाँरक' ठाढ़ रहल,भेल ने झूरझमान छी
रंजू गेली जान गँवा कए,हम यैह आब ठानल मोनसँ
झग़ड़ू-बिमल-सुरेशक व्यर्थ ने करबाक बलिदान छी
बड्ड रहल ठुकराओल हम,आब आर ने चुप बैसब
"राजीव"कहैथ नेतागणसँ,छोड़ू बुझब हम अज्ञान छी
@राजीव रंजन मिश्र
No comments:
Post a Comment